اسلام آباد۔27اگست(اے پی پی)وفاقی وزیر خزانہ و محصولات سینیٹر محمد اورنگزیب ایشیائی ترقیاتی بینک (اے ڈی بی) دے صدر مساتو کانڈا نال ملاقات کیتی۔ وزارت خزانہ، فیڈرل بورڈ آف ریونیو، وزارت اقتصادی امور دے سینئر حکام اتے ایشیائی ترقیاتی بینک دے حکام وی ایں موقع تے موجود ہن۔ ایشیائی ترقیاتی بینک دے وفد اچ بینک دی پاکستان اچ کنٹری ڈائریکٹر ایما فان، ڈائریکٹر جنرل برائے وسطی و مغربی ایشیا لیا گٹیریز اتے پاکستان دے ایگزیکٹو ڈائریکٹر برائے اے ڈی بی نور احمد شامل ہن۔ وزیر خزانہ حالیہ سیلاب دے بعد پاکستان دی ماحولیاتی لچک اتے قدرتی آفتاں نال نبڑݨ دی تیاری دے عزم کوں اڳونہا کیتا اتے ایشیائی ترقیاتی بینک دے صدر نال اپریل اچ واشنگٹن اچ تھیوݨ آلیاں ملاقاتاں کوں وی خوش آئند قرار ݙتا۔ انہاں وفد کوں پاکستان دی معاشی صورتحال دا ݙسایا۔ انہاں پاکستان اچ وسائل دے بہتر استعمال، تریمتیں دی مالی شمولیت، ڈیزاسٹر رسک فنانسنگ اتے ماحول دوست توانائی دی طرف منتقلی اچ بینک دے تعاون دی تعریف کیتی۔ مستقبل دی سانجھ تے ڳالھ کریندے وزیر خزانہ توانائی دی منتقلی، ماحولیاتی لچک، ٹرانسپورٹ و لاجسٹکس، انسانی وسائل دی ترقی اتے وسائل دے بہتر استعمال اچ ودھ تعاون دی خواہش کیتی۔ انہاں پالیسی تے مبنی فنانسنگ، کیپیٹل مارکیٹس دی ترقی، نجی شعبے دی شمولیت اتے گرین بانڈز، بلینڈڈ فنانس اتے ڈیٹ فار نیچر سویپس جیڑھے نویں مالیاتی ذریعیاں اچ وی تعاون ودھاوݨ دی لوڑ تے زور ݙتا۔ وزیر خزانہ آوݨ آلے 2026-2035 دی اے ڈی بی کنٹری پارٹنرشپ سٹریٹیجی اچ تعاون دی دعوت وی ݙتی جو پاکستان دی وچلی مدت دی ترقیاتی ترجیحات نال ہم آہنگ ہوسی۔ ایشیائی ترقیاتی بینک دے صدر مساتو کانڈا پاکستان دی معاشی اصلاحات اتے استحکام دیاں کوششاں کوں سراہا اتے یقین ݙیوایا جو اے ڈی بی خاص طور تے موسمیاتی تبدیلی نال نبڑݨ، آبادی دے مسئلیاں، بنیادی ڈھانچہ دی تعمیر اتے وسائل دے حصول دے شعبیاں اچ پاکستان دی مدد جاری رکھیسی۔
.jpg)
