اسلام آباد۔14فروری(اے پی پی) وفاقی وزیرخزانہ ومحصولات سینیٹر محمد اور نگزیب نجی شعبے دی قیادت اچ معیشت دی ترقی اتے برآمدات تے مبنی معشیت کوں ودھارا ݙیوݨ دا حکومتی عزم کریندے آکھیے معیشت دے مختلف شعبیں اچ ڈھانچہ جاتی اصلاحات تے عملدرآمد جاری اے، زرعی انکم ٹیکس اچ چنڳی پیشرفت تھئی اے، پنشن اصلاحات تے عمل تھیندا پئے 43 وزارتاں تے 400 جڑیے محکمیں دی نویں سروں تنظیم کیتی ویندی پئی اے۔ا ےڳالھ انہاں اتھاں ا نٹرنیشنل فنانس کارپوریشن (آئی ایف سی) دے منیجنگ ڈائریکٹر و ایگزیکٹو نائب صدمختار دایوپ دی قیادت اچ وفد کوں ملاقات اچ آکھی ۔ وفد اچ آئی ایف سی دی علاقائی نائب صدر ہیلا چیکروحو، مشرق وسطیٰ، پاکستان اتے افغانستان سانڳے آئی ایف سی دے علاقائی ڈائریکٹر خواجہ آفتاب احمد، پاکستان اچ عالمی بینک دے کنٹری ڈائریکٹرناجی بن حسائن تےپاکستان وافغانستان سانڳے آئی ایف سی دے کنٹری منیجر ذیشان شیخ شامل ہن۔ وزیر خزانہ دے رلے عالمی بینک کیتے ایگزیکٹوڈائریکٹر ڈاکٹر سید توقیر حسین شاہ، سیکرٹری خزانہ امداد اللہ بوسال اتے فنانس ڈویژن دے سینئر افسر موجود ہن ۔وفد دا خیرمقدم کریندے وزیر خزانہ آئی ایف سی کوں نجی شعبے نال اڄوکے معاہدیں تے مبارخ ݙتے تے پاکستان اچ نجی اداریں دے متحرک، فعال اتے کامیاب کردار دی تعریف کیتی ۔ انہاں وفد کوں ملکی مجموعی معاشی صورتحال دے استحکام دا ݙسائے ۔ وزیرخزانہ وفد کوں دبئی اچ آئی ایم ایف دی منیجنگ ڈائریکٹر کرسٹالینا جارجیوا نال تھیوݨ آلی ملاقات دا حوالہ ݙتے تے آکھیے منیجنگ ڈائریکٹر آئی ایم ایف پاکستان دی اقتصادی نمواتےاستحکام سانڳے اقدامات دی تعریف کیتی اے ۔وز یرخزانہ آکھیےڈیووس اچ آئی ایف سی نال گزریل ملاقات دے بعد توں قرض اتے ایکوئٹی ݙوہیں شعبیں اچ بہتری آئی اے ۔ وزیرخزانہ وفد کوں معیشت دے مختلف شعبیں اچ ڈھانچہ جاتی اصلاحات دا وی ݙسائے تے آکھیے ٹیکس دی بنیاد اچ وسعت آئی اے، زرعی انکم ٹیکس اچ نمایاں پیشرفت تھئی اے جو بے مثال قدم اے، پنشن اصلاحات تے عمل درآمد تھیندا پئے ، 43 وزارتاں اتے 400 منسلک محکمیں دی تنظیم نو کیتی ویندی پئی اے جنہاں اچ کئی کوں ضم یا ختم کرݙتا ویسی ۔ انہاں نجی شعبے دی قیادت اچ معیشت دی ترقی اتے برآمدات تے مبنی معیشت کوں ودھارا ݙیوݨ دے حکومتی عزم دا اعادہ کیتے تے آئی ایف سی دی مسلسل حمایت تے انھاں دا شکریہ ادا کیتے۔آئی ایف سی دے منیجنگ ڈائریکٹر وزیر خزانہ دی مہمان نوازی دی تعریف کیتی تے حکومت دی طرفوں اصلاحات دی کوششاں دی تعریف کیتی ۔ انہاں آکھیے پاکستان اچ نجی شعبہ دے متعلقہ شراکت دار حکومت اتےوزیر خزانہ دی پالیسیاں تے اعتماد دا اظہار کریندے پئن ۔ انہاں پاکستان دے کنٹری پارٹنرشپ فریم ورک کوں عالمی سطح تے بہترین مثالاں اچوں ھک قرار ݙتے ۔مختار دایوپ پاکستان نال نیڑے تعاون دا عزم کیتے تے ݙسائے آئی ایف سی ماحول دوست توانائی، ڈیٹا سینٹرز، زرعی سپلائی چین اچ بہتری، ٹیلی کام سیکٹر تے ڈیجیٹلائزیشن جیھے اہم شعبیں اچ تعاون کریسی ۔وزیر خزانہ حکومت دی طرفوݨ سیوئیرہائوسز کوں ھک صنعت دے طور تے منݨ دے اڄوکے اعلان دا ذکر کیتا تے بنیادی ڈھانچے، آئی ٹی، ڈیٹا سینٹرزتے ھک ٹیک اچ سرکاری و نجی شراکت داری دے عزم دا اعادہ کیتے۔انہاں زرعی آمدنی دے ٹیکس تے مزید ڳالھ کریندے ایں ڳالھ تے زور ݙتے جو سرمایہ دی نقل و حرکت اچ نجی شعبے کوں مرکزی کردار ادا کرݨا ہوسی۔ انہاں اے وی ݙسائے کئی بین الاقوامی شراکت داراں پاکستان اچ ودھدی سرمایہ کاری دی صلاحیت دا اعتراف کیتے۔ فریقین معاشی ترقی اتے سرمایہ کاری اچ تعاون دا عزم کیتے۔
.jpg)
.jpg)
.jpg)
