اسلام آباد۔12مئی(اے پی پی) وزیراعظم محمد شہباز شریف آکھیے عمران نیازی کوں دھاندلی تے جھرلو نال وزیراعظم بݨایا ڳیا ہئی، انہاں کوں گھن آوݨ آلیں دا مقصد ساریں کوں چور ڈاکو قرار ݙیواوݨاں ہئی، عمران نیازی کوں 10سال تئیں مسلط رکھݨ دا منصوبہ ہئی ، پی ٹی آئی قیادت ملک کوں تباہی توں ݙو چار کرݙتا، عمران نیازی دے خلاف مقدمات کوں شجر ممنوعہ قرار ݙتا ڳئے ،جے عمران خان خائن اتے بددیانت کائنی تاں عدالت اچ آپݨی بے گناہی ثابت کرے،ݙوڑے معیار توں انصاف دا جنازہ نکل ڳئے۔ جمعہ کوں وفاقی کابینہ دے اجلاس اچ ڳالھ کریندے ہوئیں وزیراعظم آکھیے عمران خان نیازی کوڑے پروپیگنڈے توں قوم کوں تقسیم کیتے تے ہر جاہ زہر پھیلائے، عمران نیازی امریکا نال تعلقات خراب کرݨ اچ کوئی کسر نی چھوڑی، اساں پاکستان دے سفارتی محاذ تے دنیا نال تعلقات بہتر بݨاوݨ کیتے اقدامات کیتے، حکومت ورثے اچ ملݨ آلے مسئلیں تے چیلنجزتے قابو پاوݨ کیتے حتی المقدور کوششاں کریندی پئی اے ، ملک ٻہوں مشکل صورتحال توں گزردا پئے ، آئینی طریقے نال منتخب ساݙی حکومت کوں امریکی سازش قرار ݙتا ڳیا ، عمران خان اتے ایندے حواری بے شرمی نال کوڑ مریندے رہیے ، پی ٹی آئی حکومت اچ ارباں روپے دی کرپشن تے کہیں جواب نی منگیا بلکہ مالم جبہ، بلین ٹری سونامی اتے بی آر ٹی جیہے کرپشن دے کیساں اچ انہاں کوں کلین چٹ ݙتی ڳئی تے انہاں مقدمیں کوں شجر ممنوعہ قرار ݙتا ڳئے جݙاں جو سابق وزیراعظم نواز شریف کوں پانامہ دے ڈرامے اتے اقامے دے اچھوتے مقدمے اچ سزا سݨائی ڳئی، انہاں اپݨی دھی دے رلے عدالتاں دا سامݨا کیتا، آصف علی زرداری دی بھیݨ کوں چاند رات کوں ہسپتال توں چاتے گرفتار کیتا ڳیا ، اڄ نیب دے غبن اتے کرپشن دے مقدمے اچ عدلیہ عمران خان کیتے آہنی دیوار بݨ ڳئی جݙاں جو ساݙے مقدمیں لٹکائے ویندے ہن۔ سال سال تئیں ضمانت دی درخواست نہ سݨی ویندی ہئی ، کل عدالت دے ریمارکس تے حیرت تھئی ، کاش فریال تالپور، مریم نواز تے اساکوں وی عدالتاں اچ ݙیکھ تے آکھیا ویندے جو تساکوں وی ݙیکھ تے ٻہوں چنڳاں لڳیے ، عام لوکاں دے مقدمیں عدالتاں اچ سالہا سال لٹکیے رہندن ، اساں صبر نال سارے مقدمیں دا عدالتاں اچ سامݨا کیتے۔ وزیراعظم آکھیے عمران نیازی دا مقصد آئی ایم ایف ڈیل کوں ختم کرݨ تے پاکستان کوں معاشی طور تے تباہ کرݨا ہئی، نیب نیازی ڳٹھ جوڑ سرمایہ کاراں کوں بھڄا ݙتے ۔ وزیراعظم آکھیے عمران نیازی حساس تنصیبات تے حملے کرائے ، جے عمران خان خائن تے بددیانت کائنی تاں عدالت اچ آپݨی بے گناہی ثابت کرے۔
