اسلام آباد۔18جنوری (اے پی پی):وزیراعظم دے ترجمان و معاون خصوصی سیاسی ابلاغ شہباز گل آکھیے جو ن لیگ جے حکومت توں ڈیل گھنݨی اے تاں لٹیے پیسے واپس کرے ، اساں ن لیگ دی کرپشن دی شہ رگ تئیں پڄ ڳیوں ، شریف برادران ملک توں ٻہر ونڄݨ کیتے ڈیل منگدے پئن ، نواز شریف دا ویزہ مسترد تھیندے ہی انہاں کوں برطانیہ توں کڈھ ݙتا ویسی ، نواز شریف بیماری دا ڈرامہ نہ کرن تے ملک اچ آتے سیاست کرن ، شریف فیملی کوں 16 ارب روپے دا جواب ݙیوݨا پوسی ۔ منڳل کوں پریس کانفرنس توں خطاب کریندے ہوئیں شہباز گل آکھیے جو ن لیگ پچھلے کئی مہینے بالخصوص 3 توں 4 مہینے توں اے ڳالھیں کریند پئن جو انہاں دی ڈیل تھی ڳئی اے ۔ انہاں توں پچھیا ویندے جو انہاں دی ݙیل کتھاں تھئی آے۔ ن لیگ دے اپݨے لیڈران پارٹی کوں ٹیک اوور کرݨ چاہندے ۔ ن لیگ اپݨے حواریاں دے ذریعے ترائے مہینے توں ڈیل دیاں ڳالھیں کھنڈیندی پئی اے ۔ انہاں آکھیے جو شریفاں دی تاریخ جے ݙٹھی ونڄے تاں انہاں پہلے ڈیل ضیا الحق ول جونیجو تے ایندے بعد جتوئی نال کیتی تے ول انہاں کوں چھرا مار تے نوازشریف وزیراعظم بݨ ڳئے۔ ایں طرح چوہدری پرویز الہٰی دے نال 1997 اچ وی دھوکا کیتا۔ انہاں مشرف دےء نال وی ڈیل کیتی جیڑھی جو پوری پارٹی دی کنڈ اچ چھری مارݨ دے برابر ہئی ، ایں ویلھے انہاں دی ساری پارٹی دی سینئر قیادت ٹی وی تے ݙساچکی ہئی جو انہاں کوں ڈیل دا کوئی پتہ کائناں ہئی ، انہاں آکھیے جو مقصود چپڑاسی دے اکائونٹ توں 700 کروڑ روپے برآمد تھئے تے ٻئے ملازمین توں 16 ارب روپے برآمد کیتن اے او ملازمین ہن جنہاں دی تنخواہ صرف 10 توں 15 ہزار روپے ہئی تاں انہاں دے اکائونٹس اچ اتنے پیسے کتھوں آئے۔ اے لوک پیسے اپݨے کنے نی رکھیندے بلکہ ݙوجھیں دے ناں توں رکھیندن ۔
