اقوام متحدہ۔8دسمبر(اے پی پی):اقوام متحدہ دی جنرل اسمبلی علاقائی اتے عالمی امن و سلامتی کوں مستحکم بݨاوݨ کیتے پاکستان دی پیش کیتی ڳئی تخفیف اسلحہ دی 4 قرارداداں دی منظوری ݙے ݙتی ۔ اے قرارداداں پاکستان دے علاقائی اتے عالمی امن تے سلامتی کوں مضبوط بݨاوݨ دے عزم دی عکاسی کریندن ۔ قرارداداں دی سفارش 193 رکنی جنرل اسمبلی دی فرسٹ کمیٹی تخفیف اسلحہ اتے بین الاقوامی سلامتی کیتی ہئی ۔ قرارداداں دےمسودیں کوں آپݨی اکثریتی حمایت توں منظور کیتا ڳیا ہئی ۔جنرل اسمبلی اچ پاکستان دی پیش کیتی ڳئی 3 قرارداداں علاقائی تخفیف اسلحہ، علاقائی اتے ذیلی علاقائی سطح تے روایتی ہتھیاراں دے کنٹرول تے علاقائی و ذیلی علاقائی تناظر اچ اعتماد سازی دے اقدامات(سی بی ایمز) متعلق قرارداداں شامل ہن جݙاں جو چوتھی قرارداد جوہری ہتھیار نہ رکھݨ آلی ریاستاں کیتے بین الاقوامی سلامتی کوں یقینی بݨاوݨ متعلق اے۔’’جوہری ہتھیار نہ رکھݨ آلی ریاستاں دے تحفظ کوں یقینی بݨاوݨ کیتے جوہری ہتھیاراں دے استعمال یا استعمال دے خطرے دے خلاف موثر بین الاقوامی اقدامات دا نتیجہ ‘‘دے عنوان توں قرارداد دی حمایت اچ 120ووٹ پئے تے کہیں رکن ملک مخالفت اچ ووٹ نی پاتا جݙاں جو 60 رکن ملکاں رائے شماری اچ حصہ نی ڳھدا ۔ قرارداد دے مطابق، اسمبلی ایں ڳالھ کوں من ڳھدا جو جوہری تخفیف اسلحہ اتے جوہری ہتھیاراں دا مکمل خاتمہ جوہری جنگ دے خطرے کوں دور کرݨ کیتے ضروری اے ۔’’علاقائی اتے ذیلی سطح تے روایتی ہتھیاراں تے کنٹرول‘‘ دے عنوان توں پیش کیتی ڳئی قرارداد دی حمایت اچ 182 ووٹ پئن۔ بھارت واحد ملک ہئی جیں ایں قراراد دی مخالفت اچ ووٹ ݙتا جݙاں جو ھک رکن ملک رائے شماری اچ حصہ نی ڳھدا ۔
