اسلام آباد۔27اگست (اے پی پی) وزیراعظم محمدشہبازشریف دشمن دے ناپاک عزائم ناکام بݨاوݨ سانڳے مکمل یکجہتی اتے دہشت گردی مکاوݨ سانڳے پکا عزم کریندے آکھیے پاکستان دے ساوے ہلالی پرچم تے آئین تے یقین رکھݨ آلیں سانڳے ڳالھ مہاڑ دے دروازے کھلن ، وختی بلوچستان دا دورہ کر تے ڳالھ مہاڑ کیتی ویسی ، بلوچستان تے خیبرپختونخوا اچ دہشت گرداں بے گناہ شہریاں کوں نشانہ بݨائے، ٹی ٹی پی دے دہشت گرد افغان سرزمین توں کارروائیاں کریندن ، دشمن طاقتاں چین تے پاکستان وچال خلیج پیداکرݨ تے ملکی ترقی روکݨ چاہندن ، سکیورٹی فورسز دیاں قربانیاں ضائع نہ ویسن ، افواج پاکستان کوں دہشت گردی مکاوݨ سانڳے سارے وسائل ݙیسوں ۔ اے ڳالھ وزیراعظم وفاقی کابینہ دے اجلاس اچ آکھی اے ۔ وزیراعظم آکھیے پچھلے کجھ ݙینھ اچ دہشت گردی دے واقعات تھئن ۔ دہشت گردی دی اڄوکی لہر اچ 50 توں ودھ پاکستانی شہید تھئن ایں توں انڄ ساݙے سکیورٹی فورسز اتے قانون نافذ کرݨ آلے افسر تے اہلکارا وی شہید تھئن ، اے اہم معاملہ ہاے۔ وزیراعظم آکھیے پچھلے کجھ مہینے اچ دہشت گردی ودھ ڳئی اے ۔ ڈیرہ اسماعیل خان ، کرک اتے ٻئے علاقیں اچ دہشت گرداں بے گناہ پاکستانیاں کوں نشانہ بݨائے ۔دہشت گردی واقعات ٻہوں قابل مذمت ہن۔ ایندے اچ کوئی شک کائنی جو ٹی ٹی پی دے دہشت گرد افغان سرزمین توں کارروائیاں کریندن ، ایں حوالے نال حکومت پاکستان دی طرفوں افغان حکومت کوں ݙسایا ڳئے تے دہشت گرداں دے خلاف موثرآپریشن کیتے ڳئن ایویں بلوچستان اچ دہشت گردی دے کل جیڑھے واقعات تھئن انہاں دی جتنی وی مذمت کیتی ونڄے گھٹ اے ۔ بے گناہ پاکستانیاں کوں شہید کرتے دہشت گرد اپݨے مذموم عزائم پورے نی کرسڳدے ۔ انھاں دا مقصد اے ہے جو ملک اچ ترقی دا سفر تے سی پیک دے پورے ملک اچ منصوبیں کوں روکیا ونڄ سڳے ،پاکستان اتے چین وچال فاصلے بݨائے ونڄن لیکن ایندے نال جیڑھے ظلم دے بربریت دے واقعے تھئن پوری قوم انھاں دی شدید مذمت کیتی ۔ وزیراعظم آکھیے اے آکھݨ دی بجائے جو دہشت گرداں ملک دے کیڑھے حصے دے لوکاں کوں نشانہ بݨائے ،جے اے آکھیا ونڄے جو پاکستانیاں کوں شہید کیتے تاں اے ملکی سالمیت سانڳے زیادہ مناسب تے موثر ڳالھ ہوسی ۔ وزیراعظم آکھیے دہشت گردی مکاوݨ دا ویلھا آڳئےایں سانڳے جیڑھیاں قربانیاں ݙتیاں ڳئن تے ݙتیاں ویندیاں پئن ضائع نہ ویسن ۔ ایں سانڳے حکومت افواج پاکستان کوں وسائل ݙیسیباقی سارے خرچے گھٹ کرتے سکیورٹی فورسز کوں سارے وسائل ݙیسوں ۔ وزیراعظم آکھیے پاک فوج دے سپہ سالار ، سکیورٹی فورسزدے افسراں تے اہلکاراں دا غیر متزلزل عزم اے دہشت گردی ہر صورت منڈھوں مکا تے دم گھنسوں ۔ ایں تے پوری قوم کٹھی تے ایندے اچ کوئی ݙوجھی صلاح کائنی ، بلوچستان اچ دہشت گرد جیڑھیاں کاروائیاں کریندے پئن انہاں دا ھکو مقصد پاکستان اچ انتشار کھنڈایا ونڄے ، وفاقی حکومت صوبائی حکومتاں نال رل تے اقدامات کریسی ۔ وزیراعظم آکھیے ساری اوکھ دے باوجود ترقی دے رستے اچ رکاوٹ تے روکݨ دیاں کوششاں ونڄا ݙیسوں تے دہشت گرداں دے مذموم ارادے ناکام تھیسن اتے اے مٹی اچ رل ویسن ، پہلی شرط اے ہے جو اساکوں آپݨے دشمناں دی سنڄاݨ کرݨی ہوسی تے انھاں دے ارادیں کوں شکست ݙیوݨ سانڳے کٹھا تھیوݨا ہوسی تے پوری یکجہتی کرݨی ہوسی ۔ وزیراعظم آکھیے ایں حوالے نال کہیں قسم دی کمزوری دا کوئی سوال ہی نی پیدا تھیندا تاں جو بلوچستان اچ او لوک جیڑھے پاکستانیت دی سوچ رکھیندن تے پاکستان دے آئین اتے سبز ہلالی پرچم کوں منیندن انھاں نال ڳالھ مہاڑ دے دروازے ہر ویلھے کھلئن تے جیڑھے دوست نما دشمن ہن انہاں نال کوئی ڳالھ نی تھی سڳدی تے نہ ہی انھاں نال کوئی نرم رویہ اختیار کیتا ویسی اے واضح پیغام اے۔ وزیراعظم آکھیے جو کل دے واقعات ساریں سانڳے لمحہ فکریہ ہن، انشاءاللہ اساں رل تے انھاں مشکلات اتے چیلنج تے قابو پیسوں ۔ وزیراعظم آکھیے دہشت گرداں سانڳے پاکستان اچ کوئی جاہ کائنی کجھ وی تھی ونڄے انہاں کوں منڈھوں مکایا ویسی ۔ وزیراعظم آکھیے او وختی بلوچستان دا دورہ کریسن ایں ساری صورتحال تے جامع ڳالھ مہاڑ کریسوں تے صورت حال دا جائزہ گھنسوں تے وختی اقدامات دا فیصلہ کریسوں ۔اللہ تعالیٰ پاکستان کوں انھاں ساری اوکھ توں آپݨے خاص فضل و کرم توں کڈھیسی تے دشمناں دے عزائم مٹی اچ رلسن۔14:44
